– No blir det store endringar her oppe

Alpingruppa i Sogndal IL kunne glise ekstra breitt då dei fekk besøk i Hodlekve. – Eg er både rørt, glad og takksam for dette, seier Atle Hole Sæterbakken.

I 2024 lanserte Sparebankstiftinga Sogn og Fjordane og Vestland Idrettskrets «Straumsmarte idrettsanlegg». Denne ordninga gir klubbar i Sogn og Fjordane moglegheita til å søke om pengar til straumsparande tiltak i idrettsanlegga sine. Som igjen vil gi klubbane lågare straumrekningar.

Dette har Sogndal IL si alpingruppe gjort, og sist torsdag fekk dei utdelt gåver på litt over 1,5 millionar kroner. 729 743 kroner frå ordninga gjennom «Straumsmarte idrettsanlegg», og 800 000 kroner direkte frå Sparebankstiftinga Sogn og Fjordane. Begge gåvene kjem frå overskotet til SpareBank 1 Sogn og Fjordane.

Sidan lanseringa av «Straumsmarte idrettsanlegg» har 21 anlegg fått pengar. Sjekk liste over alle nedst i saka.

Flytting av lysanlegg

Trioen som overrekte gåvene var Nils R. Sandal frå Vestland Idrettskrets, Jan Petter Vadheim frå SpareBank 1 Sogn og Fjordane og Hallvard Klakegg frå Sparebankstiftinga Sogn og Fjordane. Sistnemnde understrekar verdien i arbeidet som blir lagt ned i anlegget, som den viktigaste grunnen for tildelingene.

– Pengane skal gå til flytting og oppgradering av lysanlegget. Det gamle lysanlegget i Hodlekve skal flyttast opp hit til Rindabotn, og her oppe skal det monterast LED-lys. Dette med tanke på å energi-effektivisere alpinanlegget, seier Klakegg.

Sandal i idrettskretsen seier at dei ser at mange idrettsanlegg får ei stor innsparing ved å gå over til LED-lys.

– Det reknar vi også med vil skjer her. I idrettskretsen er vi svært glade for at Sparebankstiftinga Sogn og Fjordane ser verdien i dette, og har etablert denne ordninga som vil bety svært mykje for mange idrettsanlegg i tida som kjem.

Har vist seg fram nasjonalt

Både Atle Hole Sæterbakken og Melanie Hetkamp-Andersen i Sogndal Alpin viser til at flytting av lysanlegget i Hodlekve mest truleg vil kunne komme i gang til sommaren.

– Det er målet vårt. No går søknaden om spelemidlar inn, og vi håpar på snarleg svar. Og med desse 1,5 millionane er vi då nær fullfinansiert. Det er utruleg flott å ha ein lokal bank som ser verdien i den jobben vi gjer. Vi hadde Telenorleikane i vinter, og Norges Skiforbund har på bakgrunn av det også ønska at vi tek på oss andre nasjonale oppdrag i framtida. Så det betyr at det er fleire som ser verdien i det vi gjer, seier Sæterbakken og smiler.

At Sogndal Alpin har stort fokus retta mot barn og ungdom er noko Hallvard Klakegg i Sparebankstiftinga ser på som svært verdifullt.

-Dette er eitt av dei viktigaste alpinanlegga i Sogn og Fjordane. Når vi ser at sist sesongen så var det 112 driftsdøgn her oppe i Rindabotn mot 18 i det gamle anlegget nede i Hodlekve, så er det riktig å samle seg om anlegget i Rindabotn. Med dei klimautfordringane vi står overfor, er dette eitt av dei anlegga som vil stå seg best i framtida. Gjennom Telenorleikane sist vinter ser vi at her har vi ei robust og kompetent gruppe av entusiastar som står på. Og fokuset mot barne- og ungdomsaktivitet er alfa og omega, seier Klakegg og vert støtta av Jan Petter Vadheim i SpareBank 1 Sogn og Fjordane.

– Anlegget i Rindabotn har stor verdi for heile regionen, og med desse oppgraderingane vil det bli meir attraktivt å nytte anlegget, seier Vadheim.

Sidan lanseringa av «Straumsmarte idrettsanlegg» har desse 21 anlegga fått pengar: 

• Flora Hestesportklubb – kr. 66 838,- (Sunnfjord Hestesportsenter)
• Gaular IL – kr. 237 469,- (Sande Stadion)
• Harpefossen skisenter – kr. 106 250 (Alpinanlegg)
• Hyen IL – kr. 145 828,- (Storskjegga, langrennsanlegg)
• Selje IL – kr. 154 900,- (Kunstgrasbane)
• Stryn Vinterski – kr. 182 813,- (Alpinanlegg)
• Ålfoten IL – kr. 228 707,- (Karlsskaret, langrennsanlegg)
• Sandane Turn og IL – kr. 171 250,- (Sandane idrettspark)
• Allmenning skyttarlag – kr. 8 200,- (Allmenningfjellet skytebane)
• Bremanger IL – kr. 146 000,- (Bjørsvika kunstgrasbane)
• Harpefossen skisenter – kr. 326 269,- (Alpinanlegget på Harpefossen)
• Haugen IL – kr. 162 208,- (Klubbhus på Klenkarberget)
• Hyllestad IL – kr. 164 000,- (Hyllestad stadion)
• IL Syril – kr. 150 000,- (Leikanger idrettspark, kunsgrasbane)
• Kinn kommune – kr. 500 000,- (Nordfjordhallen)
• Sogndal kommune – kr. 538 300,- (Sogndal idrettshall, symjeanlegg)
• Stryn kommune – kr. 409 000,- (Stryn kulturhus, symjeanlegg)
• Sunnfjord kommune – kr. 62 500,- (Årdal lysløype)
• Sogndal IL – kr. 729 743,- (Sogndal skisenter Hodlekve)
• Kinn kommune – kr. 199 639,- (Florø stadion)
• Årdal kommune – kr. 166 666,- (Årdalshallen)