Verksemda vår

Her kan du lese om korleis vi jobbar med å oppretthalde vår visjon, verdiar, mål og strategiar. Stiftinga er opptekne av å sikre at interessentar og allmenheita får innsyn i korleis verdiar og gåver blir forvalta.

Dagleg drift

Viktige arbeidsoppgåver for styring og kontroll med verksemda i Sparebankstiftinga Sogn og Fjordane er å

Sjå til at lover, vedtekter, reglar og etiske retningslinjer blir etterlevd

Fastsette, informere om og følgje opp vedtak og dokument som omfattar stiftinga sin visjon, verdiar, mål og strategiar

Etablere rutinar som sikrar styrande organ tilfredsstillande innsikt og kontroll med verksemda. Dette omfattar stiftinga sine investeringar, gåvetildelingar og forvaltning av stiftinga sine verdiar

Etablere eit informasjons- og kommunikasjonsopplegg som sikrar stiftinga sine interessegrupper og folk flest innsyn i korleis verdiar og gåveinstitutt blir forvalta.

Risiko og rutinar for etterleving

Styret har utarbeidd ein forvaltningsstrategi, som skal sikre at stiftinga sine verdiar blir forvalta på ein sikker og god måte, og at verdiane ikkje vert eksponerte for uventa hendingar. Det er også utarbeidd ein samhandlings- og eigarstrategi, som skal sikre at stiftinga kan oppfylle målet om eit tilfredsstillande utbytte og god verdiauke på eigenkapitalbevisa.

Ansvarsfordeling mellom styret og administrasjon og reglar for rapportering til styret er fastsett gjennom instruks for styret og dagleg leiar, prinsipp for styring og kontroll og rutine for risikostyring. I tillegg er det utarbeidd rutine for tenestekjøp, rutine for rekneskapsføring og rutine for gåvetildeling.

Forvaltning

I forvaltning av stiftinga sine verdiar skal det takast utgangspunkt i at stiftinga skal kunne delta i framtidige kapitalutvidingar i SpareBank 1 Sogn og Fjordane og sikre stabil drift med gåveutdeling. Stiftinga skal ha evigvarande drift som utgangspunkt for si kapitalforvaltning og skal ikkje investere i høgrisikoprodukt som derivat, strukturerte produkt, valuta, terminforretningar og enkeltaksjar. Det skal også visast stor grad av aktsemd for å unngå investeringar som utgjer ein uakseptabel risiko for medverknad til uetiske handlingar, krenking av menneske- og arbeidstakarrettar, korrupsjon og miljøøydeleggingar.

Etiske retningslinjer

Sparebankstiftinga Sogn og Fjordane er avhengig av full tillit frå alle interessegrupper; søkjarar av gåvemidlar, styresmakter, leverandørar og andre forretningssamband, tilsette og frå folk flest. Det må ikkje vere tvil om tillitsvalde og tilsette sin profesjonalitet og integritet.

Det er difor utarbeidd etiske reglar som inneheld generelle prinsipp for aktsemd ved utøving av arbeid eller verv for stiftinga. Reglane gjeld for medlemer i styrande organ og alle tilsette

Openheit

I Stiftinga er vi opptatt av å vere opne og transparente i arbeidet vi gjer. Vi deler derfor informasjon om styrande organ, prosess for gåvetildeling og framtidige investeringar med banken og Stiftinga sine interessegrupper. Vi er opne om kven som sit i styret, kva vedtekter og strategiar vi følgjer, og kva etiske retningslinjer vi har. Du vil finne søknadsskjema for gåver, fristar for å søkje, og informasjon om kven som blir prioritert eller ikkje. I tillegg publiserer vi kven som har fått tildelt gåver og kva vi har investert i. Alt dette gjer vi for å sikre at du kan ha tillit til oss og vår verksemd.

Vi legg ut informasjonen på nettsidene etterkvart som det er relevant.

Noko du saknar? Ta kontakt med oss så hjelper vi deg.