200 000 kroner til Bergens nye og flytande attraksjon

/i /av

Ei flytande badstu der det kan arrangerast alt frå livredningskurs til konsertar – og der ein berre kan stikke innom for å kose seg – det blir ein realitet i Bergen til sommaren.

Prosjektet Laugaren i Bergen er tildelt ei gåve på 200 000 kroner. Denne gåva er gitt av Sparebankstiftinga Sogn og Fjordane, og pengane kjem frå overskotet til Sparebanken Sogn og Fjordane. Gåva vart delt ut av Torunn Steimler, som er banksjef ved Sparebanken Sogn og Fjordane sitt kontor i Bergen.

– Dette betyr veldig mykje for oss. No er vi omtrent i mål med finansieringa. Gåva betyr at vi no kan konsentrere oss om å bygge den ferdig, så dette er heilt alfa og omega for oss, seier Bjørnar Skaar Haveland i Bergen Laugarlag.

Frå livredningskurs til konsertar

Men Laugaren, kva er det eigentleg for noko? Jo, det er rett og slett ein flytande badstu og kulturarena. Her kan kven som helst stikke innom, men der vil også bli symjeopplæring, livredningskurs og småkonsertar – for å nemne noko. Sjølve plattformen er 72 kvadratmeter og vil innehalde badstu, oppholdsrom, skifterom og badebrygge. Laugaren skal ha si heimehamn ved USF Verftet i Bergen, og her kan du lese meir om den.

Ideen kom for om lag tre år sidan då Haveland og dei andre i hans faste badegjeng møttest som vanleg ein morgon. Kvar onsdag startar dei nemleg dagen med eit morgonbad ved Verftet.

– «Hadde det ikkje vore digg med ein badstu?», spurte eg dei andre. Og då sa Kine: «Det har eg alltid sagt, men ingen vil bygge det med meg». Då begynte ballen å rulle, seier Haveland.

Det starta som ein liten greie, men etter å ha arrangert nokre workshopar med ulike personar og fekk sjekka interessen, så vart det heile større ein dei hadde tenkt. Prosjektet har eit budsjett på 2,5 millionar kroner.

– Vi starta prosjektet utan pengar, men vi begynte på det medan vi leita etter midlar. Vi fekk litt i starten, men ikkje i nærleiken av  nok. Men det er jo slik at det ofte kjem gode ting ut av å gjere ting, og det viste seg å vere sant, seier Haveland, som til dagleg er arkitekt og har god erfaring med byutvikling. Det kom sjølvsagt godt med i dette prosjektet.

Opnar til sommaren

Etterkvart kom mange på dugnad og midlane kom også sakte men sikkert. No er Bergen Laugarlag etablert med 120 medlemmar, og til sommaren opnar Laugaren. Den vil bli drifta i kombinasjon av drop-in og utleige til grupper.

– Målet vårt er å halde prisen så låg som mogleg, og vi kjem til å ha ein drop-in-modell slik at folk enkelt kan komme innom. Den er også designa slik at den kan flyttast rundt og ha kulturelle prosjekt i ulike byrom, seier Haveland.

Torunn Steimler, Sparebanken Sogn og Fjordane sin banksjef i Bergen, seier at det fleire ting som gjer at dette er eit prosjekt som dei gjerne ville vere med å støtte.

– Dei starta med null i kapital og alt er gjort på dugnad, og det er fantastisk i seg sjølv. Men det at dei også tek det eit steg vidare med samfunnsansvaret dei tar når dei vil tilby symjeopplæring og livredningskurs, i tillegg til kulturarrangement, er kjempeflott!

– Dette vil bli ein attraksjon i Bergen, og det er veldig kjekt for oss å vere med og støtte prosjektet, seier Steimler.

KVAR ONSDAG: Morgonbad med påfølgande kaféfrukost er fast onsdagstradisjon for denne badegjengen i Bergen. Banken sine utsendte sto over førstenemnde, men var gladeleg med på kafé.

 

Kunnskap i tillegg til kroner

/i /av

Ønskjer du å styrkje kompetansen i laget ditt, til dømes i samband med eit prosjekt de jobbar med? Då kan du merke deg namnet Prosperastiftelsen.

Vi i Sparebankstiftinga erfarer med jamne mellomrom at det ikkje berre er pengar som trengst for å gjennomføre samfunnsnyttige tiltak; men at det er like viktig å tilføre organisasjonar kunnskap og kompetanse om utfordringane dei står ovanfor. Difor vart vi veldig interesserte når vi høyrte om Prosperastiftelsen, ei allmennyttig stifting som gir lag og organisasjonar topp kompetanse i staden for pengar.

Prosperastiftelsen har over 1200 frivillige konsulentar over heile landet, mange av dei ekspertar på sine felt. Når Prosperastiftelsen tar opp eit prosjekt, sett dei saman eit team med konsulentar som jobbar gratis for den aktuelle organisasjonen, vanlegvis i 3 månadar. Dermed får organisasjonane tilført kompetanse som dei elles måtte betale for, og får høve til å gå laus på enda meir utfordrande oppgåver enn elles.
Prosperastiftelsen tilbyr òg ei rekkje verktøy og ressursar som kan vere nyttige for lag og organisasjonar, til dømes denne “Kokebok for berekraft i ideelle organisasjonar”.

Sparebankstiftinga Sogn og Fjordane ga i februar Prosperastiftelsen ei gåve på 180.000 kroner, slik at dei kan hjelpe organisasjonar også i Sogn og Fjordane med særleg krevjande utfordringar i 2022.

Dersom du har eit prosjekt du ønskjer hjelp frå Prosperastiftelsen til, kan du ta kontakt med oss i stiftinga sin administrasjon.

EIN HALV MILLION TIL FRIIDRETTEN I SOGN OG FJORDANE

/i /av

– Dette set vi utruleg stor pris på. Denne gåva er til alle i Sogn og Fjordane som er glade i friidrett, seier Asgeir Årdal, dagleg leiar i Norsk Friidrett Sogn og Fjordane.

Det er framleis nokre få dagar att til julekvelden, men Asgeir Årdal gliser breitt allereie. For på kontoen til friidrettskrinsen vil det i løpet av kort tid komme inn ein solid sum. Då den daglege leiaren i friidrettskrinsen tok turen innom banken i Førde nyleg, drog nemleg Roy Stian Farsund fram ein sjekk frå juletreet. 500 000 kroner, sto det på den.

Denne gåva er gitt av Sparebankstiftinga Sogn og Fjordane, og pengane kjem frå overskotet til Sparebanken Sogn og Fjordane.

– Ja, dette var ein kjempeflott julepresang for oss. No gler vi oss veldig til 2022, og då skal desse pengane kome til stor nytte, seier Årdal.

Klubbane kan låne gratis

Pengane skal brukast til heilt nytt tidtakarutstyr, som klubbane i Sogn og Fjordane kan låne gratis. For ved arrangement er det ein del krav som følgjer med, og tidtakarutstyr er kostbart.

– I staden for at klubbane skal bruke mykje pengar på å kjøpe eit eige, kan dei heller låne gratis av krinsen. Dette vil skape meir aktivitet, og dermed meir inntekt for laga. Vi har 64 medlemslag i friidrettskrinsen, og alle vil ha tilgang på det samme utstyret, både det vi har frå før og det nye som kjem, forklarer Årdal.

Han seier vidare at det også er kome nye krav når det gjeld løypemåling. Det betyr at alle mosjons- og landevegsløp rundt om i Sogn og Fjordane må kontrollmåle løypa si på nytt.

– Dette har ein kostnad på rundt 100 000 kroner for kvar klubb, men som dei no heller kan bruke på å skape aktivitet i staden.

– Nødvendig med investeringar for å skape aktivitet

Julenisse for anledninga og direktør på bedriftsmarknaden i Sparebanken Sogn og Fjordane, Roy Stian Farsund, seier at banken heiar veldig på dei som skapar aktivitet og møteplassar rundt om kring i Sogn og Fjordane.

– Vi har mange flotte organisasjonar og viktige eldsjeler, som gjennom heile året bidreg til dette. Friidrettskrinsen er utvilsamt ein av desse viktige organisasjonane, og vi lar oss imponere av den store aktiviteten som dei er med og legg til rette for, seier Farsund.

– Friidrettskrinsen legg til rette for god breidde, men sikrar også at unge og lovande utøvarar får ein arena dei kan trene og utvikle seg innanfor si friidrettsgrein. Og for å skape eit attraktivt tilbod og ein god møteplass, er det viktig at ein har det utstyret som er nødvendig, og det er då behov for å gjere investeringar. Vi har vore med og støtta tidlegare, og når ein ser nytten det har hatt, så er det kjekt å vere med å bidra igjen, held han fram.

Dette set dagleg leiar Årdal stor pris på.

– Friidretten skal vere for alle, både for mosjonistar og unge utøvarar som vil opp og fram. Då er det veldig kjekt at vi har ein lokalbank som ser verdien dette har og er med og støttar oss, seier han.

MILLIONGÅVE TIL RØDE KORS: – HEILT FANTASTISK!

/i /av

Å få reise på vinterferie er dessverre er ikkje sjølvsagt. Då er det godt vi har «Vinterferie for alle» som Sogn og Fjordane Røde Kors denne veka arrangerer. 

– Eg gler meg veldig til å sjå korleis dette blir! Når alle ungane kjem ut av bussen, skal finne romma sine, og få seg heilt nye venner og opplevingar. Det blir spennande, seier Katja Nielsen.

Ho jobbar med «Ferie for alle» i Sogn og Fjordane Røde Kors, og denne veka er det klart for årets vinterferie. Der arrangerer dei to leirar ved Nordfjord Fritidssenter i Stryn, og til saman 80 personar skal delta.

Til dette fine tilbodet har Sogn og Fjordane Røde Kors fått ei gåve på 200 000 kroner. Gåva er gitt av Sparebankstiftinga Sogn og Fjordane, og pengane kjem frå overskotet til Sparebanken Sogn og Fjordane.

Gjennom Sparebankstiftinga Sogn og Fjordane, som er banken sin hovudeigar, har Røde Kors også fått ei gåve til på 800 000 kroner. Meir om denne tildelinga kan du lese om litt lenger nede i denne saka.

Vil gi familiar ei felles oppleving

Men først meir om «Vinterferie for alle». Dette er eit gratis ferietilbod for familiar med låg inntekt.

– Dette er eit tilbod til dei som ikkje har råd til å feriere elles. Det er sårbare grupper, og kanskje nokon som ikkje har så mange relasjonar her i området. Dette kan hjelpe dei med å bygge nettverk, og bli kjent med andre på same alder og i same situasjon, seier Nielsen.

– Leiren tek utgangspunkt i barna, men foreldra er også med, og då handlar det om å gi dei ei felles oppleving, held ho fram.

På leiren kan dei glede seg til alt frå skiaktivitetar, teikning og bingo, til hundesledekøyring, tur på Loen Skylift, teikning, perling og generelt gøy for alle.

Måtte eigentleg avlyse eine leiren

Som tidlegare år vert det to leirar i år også, men det var ikkje sjølvagt at det kom til å bli slik. Av økonomiske grunnar hadde dei landa på at eine leiren måtte avlysast.

– Eg hadde akkurat informert ressursgruppa om at vi måtte innsjå at eine leiren vart avlyst. Så gjekk det under eitt minutt, og då ringte Pål i Sparebankstiftinga Sogn og Fjordane og informerte om gåva. Korleis er det mogleg? Det var som sendt frå oven, seier Nielsen og gliser.

Dette er veldig gledeleg, synast Linda Vøllestad Westbye. Ho er direktør for privatmarknaden i Sparebanken Sogn og Fjordane, og delte ut sjekken til Røde Kors.

– Dette er eit fantastisk tilbod, og denne veka er det mange som vil få nye vennskap som dei ikkje ville fått elles. For oss er det ekstra motiverande å dele ut noko av overskotet vårt til ein så viktig aktør med mykje frivilligheit, og til eit så hjartevarmt prosjekt, seier Vøllestad Westbye.

800 000 som lokallaga kan søke om

Som det står innleiingsvis er Sogn og Fjordane Røde Kors også tildelt ei anna gåve på 800 000 kroner frå Sparebankstiftinga Sogn og Fjordane. Desse pengane kan dei 26 lokalforeininga i Sogn og Fjordane søke om å få ein del av. Dette kan vere til utstyr, aktivitetar eller kursing av frivillige.

– For oss er denne gåva fantastisk! Å få ha ein eigen pott der dei lokale laga kan søke direkte til oss, gjer at terskelen vert lågare for å søke, seier Dag Hovland, dagleg leiar i Sogn og Fjordane Røde Kors.

Han fortel at talet aktive og frivillige har auka under pandemien.

– Eg vil takke alle våre 2600 frivillige som bidrar på ulike måtar. Mellom anna vil deltakarane på vinterleiren denne veka få heimestrikka sokkar og vottar som er laga av frivillige. Heilt fantastisk, seier Hovland.

Også i fjor fekk Sogn og Fjordane Røde Kors ei gåve som lokallaga kunne dra nytte av. Den var på 600 000 kroner, og kan lesast om her.