Hevar beløpsgrensa for mindre prosjekt/ tiltak

Sparebankstiftinga Sogn og Fjordane hevar beløpsgrensa for mindre prosjekt/ tiltak – frå kr. 30 000,- til kr. 50 000,-.

Vi gjer det lettare for deg å realisere ideane dine!

Kvifor denne endringa?
Beløpshevinga kjem som eit resultat av:

  • Auka kostnadsnivå: Prisane på varer og tenester har stige, og dette gjer at mange prosjekt har behov for meir støtte enn før.
  • Effektivitet og fleksibilitet: Med den nye beløpsgrensa kan mindre prosjekt få raskare og enklare tilgang til midlar, noko som sparar tid for både søkjarar og oss i administrasjonen

Målet med denne justeringa er å bidra til at fleire gode idear kan bli realisert i lokalsamfunnet, utan at søknadsprosessen vert meir komplisert.

Når trer endringa i kraft?
Den nye beløpsgrensa gjeld for søknader med verknad frå 1. februar 2025.

Korleis søkje?
Har du eit prosjekt som treng støtte under kr. 50 000,-? Då kan du sende inn ein søknad via søknadsportalen til stiftinga.

Søknadstips.

Hugs at det er løpande søknadsfrist for gåvesøknader under kr. 50 000,-, med ei saksbehandlingstid på berre 4 veker.

Vi gler oss til å bli kjent med dei gode ideane dine!

Val til Sparebankstiftinga si generalforsamling

Er du kunde med innskot i SpareBank 1 Sogn og Fjordane? Då kan du nominere kandidatar til Sparebankstiftinga Sogn og Fjordane si generalforsamling, som mellom anna velgjer styret og godkjenner stiftinga sitt rekneskap. Generalforsamlinga set òg rammer for gåvetildelingane.

Sparebankstiftinga Sogn og Fjordane er hovudeigar av SpareBank 1 Sogn og Fjordane, og har som føremål å vere ein langsiktig eigar av banken og dele ut gåvemidlar til samfunnsnyttige tiltak. Stiftinga si generalforsamling vert valt av kundar med innskot på over 500 kroner i banken og med adresse i Sogn og Fjordane og Hornindal. Valet skjer elektronisk, og alle med røysterett vil få røystesetel per e-post 10. mars, med to dagar svarfrist.

Dei tre kandidatane med flest stemmer i valet vil få fast plass, og den 4. får ein varaplass.

Har du forslag til kandidatar til generalforsamlinga?
Send inn fullt namn, adresse og yrke på din (-e) kandidat (-ar) seinast 7. februar 2025 per e-post; post@sparebankstiftinga.no 

Det ferdige framlegget til kandidatar frå valnemnda vert annonsert her medio februar.

Valet går av stabelen 10 -12 . mars. Alle med røysterett vil motta røystesetel per e-post.

Her kan du lese meir om Generalforsamlinga sine oppgåver.

Medlemer i generalforsamlinga

  • Åge Avedal, Førde (leiar). Valt til 2028.
  • Kristin Svardal, Florø (nestleiar). Valt til 2027.
  • Linda Hovland, Dale. Valt til 2027.
  • Roger Aa Djupvik, Sandane. Valt til 2028
  • Siv Merete Stadheim, Florø. Valt til 2028
  • Geir Ståle Støfring, Vassenden. Valt til 2026.
  • Thomas Norheim Moen, Årdalstangen. Valt til 2027.
  • Gro Rukan, Eikefjord. Valt til 2025 (på val).
  • Nils Magne Slinde, Leikanger. Valt til 2025 (på val).
  • Daniel Kvernøy, Eivindvik. Valt til 2025 (på val).
  • Laila Johannessen, Leirvik. Valt til 2026
  • Monika Refvik, Raudeberg. Valt til 2026

Varamedlemer

  • 1. John Gerick Bårøy, Hyllestad. Valt til 2026.
  • 2. Anne Skår, Sogndal. Valt til 2025 (på val).
  • 3. Malene Lunde Sætren, Bryggja i Måløy. Valt til 2028 
  • 4. Thea Flo, Hjelledalen i Stryn. Valt til 2027

Godt val!

 

 

Brenn du for Sogn og Fjordane?

Read more

Dagsturhyttene i Vestland – inspirasjon til naturopplevingar

Dagsturhyttene i Vestland er eit resultat av eit unikt samarbeid mellom kommunane, Sparebankstiftinga Sogn og Fjordane, Eviny og Vestland fylkeskommune. Saman har vi jobba for å skapa møteplassar som gjev deg høve til å oppleve den fantastiske naturen i regionen.

No! Endeleg kan vi sleppe dette til deg! Etter fleire års arbeid har vi publisert ei heilt ny bok om dagsturhyttene i Hordaland, og samstundes har vi oppgradert innhaldet i dagsturhytteboka for Sogn og Fjordane. Desse bøkene er tilgjengelege for deg som ønskjer inspirasjon til turar og naturopplevingar i fylket. Du kan få tak i bøkene ved å kontakte kommunehus, tannklinikkar eller friluftslivsorganisasjonar.

Som ein del av prosjektet har vi utvikla desse bøkene for å gje deg tips, inspirasjon og historier som passar både for store og små turgåarar. Målet er å gjera terskelen lågare for å komme seg ut på tur og nyte det Vestland har å by på.

Bøkene er gratis, og vi oppmodar deg til å ta med eit eksemplar heim. Kanskje kan dei også inspirere til å planleggje nye turar eller til å utforska nye delar av fylket?

Dagsturhyttene er ein del av ei større satsing på folkehelse, friluftsliv og lokale fellesskap. Gjennom prosjektet ønskjer vi å leggje til rette for ein aktiv kvardag og styrke samhaldet i lokalsamfunna.

Visste du?

  • Kvar dagsturhytte er plassert med omsyn til å vera tilgjengeleg for flest mogleg, og samstundes gje ei flott naturoppleving.
  • Dagsturhyttene er eit lågterskeltilbod – perfekte for både familiar, vennegjengar og enkeltpersonar.

Vi vonar du får glede av å besøke dagsturhyttene, og at bøkene kan vera med på å gje deg ein ekstra grunn til å nyte naturen i Vestland.

God tur!

Foto: Ronny Lockert

1,3 millionar til “Straumsmarte idrettsanlegg”

Vestland Idrettskrets har i samarbeid med Sparebankstiftinga tildelt nesten 1,3 millionar kroner til “Straumsparte Idrettsanlegg”. I første runde har 8 idrettslag/ klubbar i Sogn og Fjordane fått midlar.

Les meir om kven som har fått midlar til på nettsidene til Vestland Idrettskrets

25 bygdehus i Sogn og Fjordane fekk pengar

25 gåvesjekkar med ein totalverdi på tre millionar kroner har fått nye eigarar. Her kan du sjå alle som har fått.

Sidan 2018 har Noregs Ungdomslag fått gåver frå Sparebankstiftinga Sogn og Fjordane, med pengar frå overskotet til Sparebanken Sogn og Fjordane.

Desse pengane har bygdehusa i Sogn og Fjordane kunne søkt direkte til ungdomslaget om, og gjennom prosjektet “Huset i bygda” er tre millionar kroner no fordelt på 25 heldige mottakarar.

– Viktige hus i bygdelaga

Denne veka var det utdeling for “Huset i bygda” på Nasdalen Grendalag sitt samfunnshus på Lunde i Sunnfjord. Her var representantar frå bygdehus rundt om kring i Sogn og Fjordane til stades.

– I 2024 har vi fått heile tre millionar kroner frå Sparebankstiftinga Sogn og Fjordane, og i kveld kan vi dele ut gåvesjekkar til heile 25 bygdehus. Dette er fordelt på 20 sjekkar som går til meir ordinære bygningsmessige tiltak, medan dei fem siste sjekkane går til det vi definerer som «universell utforming» av desse viktige husa i bygdelaga rundt omkring i fylket, fortalde Ida Søderstrøm, som er organisasjonskonsulent i Norges Ungdomslag.

Hjartet i bygda

– Vi er vi opptekne av at det skal vere lys i husa, og det skal vere aktivitet i bygdene. Bu- og bli-lyst er viktige omgrep for oss, og vi veit at desse viktige kulturhusa betyr mykje for barn, ungdom, vaksne og eldre rundt i bygdene. Mange plassar er desse bygga sjølve hjartet i bygda, og her får mange kjennskap til viktige verdiar som fellesskap og dugnad, sa Yngve Thorsen, som er gåve- og samfunnskontakt i Sparebankstiftinga Sogn og Fjordane.

Sparebankstiftinga Sogn og Fjordane er eigar av Sparebanken Sogn og Fjordane, og forvaltar delar av overskotet i banken mellom anna med å gje gåver til allmennyttige føremål i heile Sogn og Fjordane.

Denne veka har det også blitt delt ut ei anna gåve som bygdehusa kan få glede av. Teater Vestland sitt nye prosjekt “Lys i bygda” har fått ei gåve på éin million kroner. Les meir om det her.

Desse fekk pengar frå Huset i bygda:

Kommune: Organisasjon: Sum:

Askvoll, Flokenes grendahus, Elvetun 75 650

Aurland, Aurland ungdomslag 100 000

Aurland, Undredal ungdomslag 300 000

Bremanger, Berle grendalag 77 000

Bremanger, Ungdomslaget Havdur, u.u. 40 000

Fjaler, Dale ungdomslag 39 000

Gloppen, Husstyret for Vonheim 115 000

Gloppen, Grendehuset Gimle u.u.100 000

Gloppen, Foreninga Breimshallen, u.u. 70 000

Gulen, Eidsbotn Vel 135 000

Hyllestad, «Trygt hus», gml. ungdomshus 50 000

Hyllestad, Skifjord grendahus, u.u. 100 000

Kinn, Almenning grendalag 40 000

Kinn, Askrova grendahus 76 000

Kinn, Stavøy grendalag 79 625

Luster, Indre Hafslo bygde- og ungdomslag 150 000

Luster, Mollandsmorki grendalag 45 000

Lærdal, Lærdal ungdomslag, Frilund 250 000

Lærdal, Lærdal ungdomslag, Frilund, u.u. 250 000

Sogndal, Vetlefjorden grendahus 60 000

Sunnfjord, Førde ungdomslag, Viking 67 000

Sunnfjord, Nasdalen grendahus, u.u. 300 000

Sunnfjord, Instedalen krins 37 000

Stad, Bryggja grendahus 110 000

Vik, Framfjord ungdomslag 224 350

*u.u.= universell utforming

 

Nasdalen Grendalag sitt hus er eitt av 25 bygdehus som har fått pengar.

20 millionar kroner til turstiar i heile Sogn og Fjordane

Takka vere pengar frå overskotet til Sparebanken Sogn og Fjordane skal DNT Sogn og Fjordane satse på friluftsliv i nærområdet og gjere kommunane meir attraktive å bu i. Målet er å utvikle nærturmoglegheitene i kvar kommune.

DNT Sogn og Fjordane er tildelt 20 millionar til eit fireårig prosjekt kalla «Eg gjekk ein tur på stien». Desse midlane vert gitt av Sparebankstiftinga Sogn og Fjordane, og pengane kjem frå overskotet til Sparebanken Sogn og Fjordane. Målet med prosjektet er å legge til rette for utvikling av både nye og noverande turstiar i Sogn og Fjordane, og dermed sikre eit attraktivt tilbod til befolkninga med omsyn til folkehelse, livskvalitet og bulyst.

Bredt samarbeid
Det er DNT Sogn og Fjordane som er prosjektleiar for prosjektet.

– Pengane frå Sparebankstiftinga Sogn og Fjordane gir oss ein unik moglegheit til å skape noko bra og varig saman! Vi må jobbe saman, på tvers av kommunar, frivilligheit og ulike organisasjonar, seier styreleiar i DNT Sogn og Fjordane, Siv Merete Stadheim.
Ho håper at mange blir med på dugnad, og at prosjektet skapar engasjement blant kommunane i Sogn og Fjordane. Draumen er at alle kommunar i Sogn og Fjordane skal kunne utvikle turruter til glede for lokalbefolkninga.

– Det er eit ønske at prosjektet skal bidra til at alle, uavhengig av alder, bakgrunn, erfaring og funksjonsevne, skal finne turområde i Sogn og Fjordane der ein kan føle seg trygge, vere fysisk aktive og få naturopplevingar. Både berekraft og tilrettelegging er viktige faktorar i prosjektet og ei prosjektgruppe beståande av fagpersonar skal rettleie i tilrettelegging, grunneigarforhold og berekraftigutvikling av stiar. I tillegg blir frivilligheita avgjerande for gjennomføring av prosjektet. Lokale prosjektgrupper beståande av kommunane og frivillige lag og organisasjonar skal saman vere med å utvikle turstiane i sine nærmiljø.

Saka held fram under bildet.

STOR GÅVE: – Dette gir oss ein unik moglegheit til å skape noko bra og varig saman, seier Siv Merete Stadheim i DNT Sogn og Fjordane.

Veldig bra at fleire får tilgang
Det var Sparebankstiftinga Sogn og Fjordane som tok initiativ til prosjektet. Dei er Sparebanken Sogn og Fjordane sin største eigar, og forvaltar delar av overskotet til banken.

– Sogn og Fjordane har ein fantastisk natur, og gjennom dette prosjektet vert det endå fleire som får tilgang til den. Det er veldig bra! Dette er eit godt og nøye gjennomarbeidd prosjekt, og det er veldig kjekt og fortent at vi med pengar frå overskotet vårt bidrar til at det vert ein realitet. Vi håpar at dette kan ha ein utløysande effekt der målet er at prosjektet skapar verdiar for 60 millionar kroner, seier Trond Teigene, administrerande direktør i Sparebanken Sogn og Fjordane.

Han vert støtta av Yngve Thorsen, leiar gåve og samfunnskontakt i Sparebankstiftinga Sogn og Fjordane.

– Å bidra til bulyst i Sogn og Fjordane, og gjere regionen vår så attraktiv som mogleg, det er viktig for oss. «Dagsturhytta» er noko alle i Sogn og Fjordane kjenner til, som vi var med og finansierte, og dette prosjektet er på mange måtar bygd på same prinsippet med at alle kommunar får same moglegheita. Med dei flinke folka i DNT Sogn og Fjordane i spissen har eg stor tru på at «Eg gjekk ein tur på stien» vert ein suksess, seier Thorsen.

Jaktar nye og spennande prosjekt

Sparebankstiftinga Sogn og Fjordane intensiverer no jakta på nye og spennande prosjekt i Sogn og Fjordane. Med fleire søknadskurs, både på nett og fysiske kurs rundt om i «gamlefylket», håpar stiftinga at kreativiteten i det frivillige organisasjonslivet skal slå ut i full blomst.

To gonger i året er det frist for å søke Sparebankstiftinga Sogn og Fjordane om gåve og støtte til allmennyttige tiltak, 1. mars og 1. september. No nærmar det seg ny frist, og i forkant av denne fristen vil gåve- og samfunnskontakt, Yngve Thorsen, reise rundt i Sogn og Fjordane for å halde kurs for potensielle søkjarar. Og han håpar det vil dukke opp nye og spennande prosjekt-idear.

Rundt i fylket

-Dei to siste vekene før fristen på haustrunden går ut, blir det fysiske kurs i Måløy, Sandane og Årdal, medan det blir eit digitalt kurs for HAFS-regionen og Gulen. I vår var det kurs i Stryn, Førde, Florø, Sogndal og Dale. På denne måten trur eg vi når ut til dei fleste deler av vårt geografiske område, seier gåvesjefen og håpar at med nye og spennande prosjektidear på gang, så kan nye gåvekroner komme viktige prosjekt til gode.

– Sparebanken Sogn og Fjordane leverer gode resultat, og er i ein god kapitalsituasjon. Dermed er vi i den gunstige situasjon at vi kan tilføre stadig meir pengar tilbake til lokalsamfunna. Stiftinga har som mål å vere ein viktig aktør for samfunnsutviklinga i Sogn og Fjordane, både som den dominerande eigaren av den største banken i området og ikkje minst gjennom utdeling av gåver til allmennyttige føremål, seier Thorsen som er gåve- og samfunnskontakt i Sparebankstiftinga Sogn og Fjordane.

100 millionar

-I år har Generalforsamlinga i stiftinga gjeve styret ei ramme på 100 millionar kroner i gåver til samfunnsnyttige tiltak. Så langt i år har vi delt ut om lag 60 millionar, så vi håpar å sjå mange gode, spenstige og ikkje minst kvalitative søknadar i tida som kjem. Det er utruleg mykje god frivilleg aktivitet rundt omkring i Sogn og Fjordane som vi gjerne vil vere med på å støtte. Så kom på kurs, ta kontakt og lever inn søknad på akkurat ditt prosjekt, er det enkle rådet frå Yngve Thorsen.

Før søknadsfristen 1. september 2024 inviterer Sparebankstiftinga til kurs i søknadsskriving.

Kurset er tilpassa lag og organisasjonar som skal søkje midlar til si verksemd, og tar for seg korleis ein søknad om midlar bør sjå ut; anten ein har tenkt å søkje gåvemidlar frå Sparebankstiftinga eller andre tilskotsordningar.

I tillegg vert det høve til å møte stiftinga sin administrasjon på dagtid kursdagen/-staden, om du ønskjer råd og innspel knytt til gåvesøknader. Nedanfor finn du informasjon om kursa og korleis du avtalar møtetid.

KURSPLAN
Torsdag 22. august 2024 – Digitalt søknadskurs for HAFS-regionen og Gulen
Kl. 20.00-21.30

Måndag 26. august 2024 – Måløy
Måløy, Kraftstasjonen
Kl. 18.00-20.00

Tysdag 27. august 2024 – Sandane
Sandane, Trivselshagen
Kl. 18.00-20.00

Onsdag 28. august 2024 – Årdal
Årdal, Årdal Teknologipark
Kl. 18.00-20.00

Ønskjer du eit møte med stiftinga?
Send førespurnad per e-post til; yngve.thorsen@sparebankstiftinga.no

Har du spørsmål – kontakt Sparebankstiftinga Sogn og Fjordane v/ Yngve Thorsen
E-post; yngve.thorsen@sparebankstiftinga.no
Tlf. nr.: 90 80 25 75

 

Påmelding til kursa gjer ein her.

 

Søknadskurs med Sparebankstiftinga

Sparebankstiftinga Sogn og Fjordane deler ut gåver av overskotet frå Sparebanken Sogn og Fjordane, og alle typar allmennyttige tiltak kan bli tildelt gåvemidlar.
Våre søknadsfristar for ordinære gåver er 1. mars og 1. september kvart år.

I framkant av søknadsfristen 1. september 2024 inviterer Sparebankstiftinga til kurs i søknadsskriving.

Kurset er tilpassa lag og organisasjonar som skal søkje midlar til si verksemd, og tar for seg korleis ein søknad om midlar bør sjå ut; anten ein har tenkt å søkje gåvemidlar frå Sparebankstiftinga eller andre tilskotsordningar.

I tillegg vert det høve til å møte stiftinga sin administrasjon på dagtid kursdagen/-staden, om du ønskjer råd og innspel knytt til gåvesøknader. Nedanfor finn du informasjon om kursa og korleis du avtalar møtetid.

KURSPLAN
Torsdag 22. august 2024 – Digitalt søknadskurs for HAFS-regionen
Kl. 20.00-21.30

Måndag 26. august 2024 – Måløy
Måløy, Kraftstasjonen
Kl. 18.00-20.00

Tysdag 27. august 2024 – Sandane
Sandane, Trivselshagen
Kl. 18.00-20.00

Onsdag 28. august 2024 – Årdal
Årdal, Årdal Teknologipark
Kl. 18.00-20.00

Påmeldingsskjema

Ønskjer du eit møte med stiftinga?
Send førespurnad per e-post til; yngve.thorsen@sparebankstiftinga.no

Har du spørsmål – kontakt Sparebankstiftinga Sogn og Fjordane v/ Yngve Thorsen
E-post; yngve.thorsen@sparebankstiftinga.no
Tlf. nr.: 90 80 25 75

Vel møtt!

Her får dronninga sjå dei nye måleria

Dronning Sonja stod for den offisielle reopninga av Astruptunet laurdag, og la ikkje skjul på sin kjærleik til Nikolai Astrup.

-Eg har vore her fleire gonger, og i dag var det eit skinande comeback av hans kunstnarheim, sa dronninga.

Sparebankstiftinga Sogn og Fjordane kjøpte for to veker sidan to originale Astrup-måleri, og måndag sist veke kunne direktør Hallvard Klakegg stolt frakte måleria «Trollebotten» og «St.Hansbål ved Jølstervannet» inn i galleriet på Sandalsstrand. Og akkurat desse to måleria var noko av det Dronning Sonja såg mest fram til å sjå plassert «der dei høyrer heime».

-Eg gleder meg spesielt til å sjå dei to nye måleria, fastheldt Dronning Sonja då ho passerte pressekorpset på veg inn i galleriet under laurdagens reopningsfest av Astruptunet.

Dei to nye

Saman med avdelingsdirektøren for kunst ved musea i Sogn og Fjordane, Tor Martin Leknes, og Anders Bjørnsen ved Sparebankstiftelsen DNB, avslutta dronninga turen blant Astrup sine måleri ned i den noko tronge galleri-kjellaren med å stoppe lenge ved akkurat desse to «nye» måleria.

-Det er fantastisk at desse måleria har komme heim. St.Hans-bålet finst jo i mange forskjellige variantar, medan Trollebotten er veldig annleis, sa Dronning Sonja medan Tor Martin Leknes orienterte om historia til akkurat dette bildet. Leknes viste også til det typiske ved at Astrup hadde måla både kvinneskikkelsar og troll inn i fjellformasjonane. Her vart dronninga og følgje ståande i fleire minutt for å samtale om måleriet.

Fekk sjå dei to måleria

Som einaste fotograf i gallerikjellaren fekk Sparebankstiftinga sin skribent oppleve Dronning Sonja sin umiddelbare glede over å sjå desse måleria, og som ho også understreka under opningstalen sin:

I samband med ei utstilling om hagar som vart vist på Royal Academy of Art, som vart avvikla samstundes som Astruputstillinga på Dulwich, hadde dronninga møtt på den britiske kunsthistorikaren Mary-Anne Stevens, som då var sjefskurator på Royal Academy og kurator for Astruputstillinga på Dulwich.

-Eg gløymer aldri kuratoren sine ord då eg ville samanlikne Astrup sine måleri saman med andre verdskjende målarar:

«I by fare prefer Nikolai Astrup´s garden in Jølster», fortalde dronninga.

Kuratoren var på tunet

Og akkurat Astrup-kjennar Mary-Anne Stevens var på plass under reopninga av Astruptunet laurdag ettermiddag, og kunne saman med direktør Hallvard Klakegg i Sparebankstiftinga Sogn og Fjordane ta dei to «nye» måleria nærare i augesyn etter at Dronning Sonja hadde reist frå Sandalsstrand.

Den britiske kuratoren og Astrup-kjennaren var begeistra over måleria, og trekte spesielt fram «Trollebotten». Dette måleriet meinte Stevens bør vere med på framtidige utstillingar.

-Måleriet treff spesielt godt barn, då dei elskar troll, sa den kjende kuratoren i samtale med Hallvard Klakegg.

For ein dag!

Og som direktør Hallvard Klakegg formulerte seg etter reopnings-suksessen:

-For ein Jølster-dag, og for ein dag for Sogn og Fjordane! Dette er kort og godt fantastisk, og vi er både stolte og audmjuke over at vi har fått kjøpe to Astrup-måleri tilbake til heimplassen hans. Her vil ålmenta kunne rusle rundt og sjå den fantastisk flott oppussa kunstnarheimen, hagen hans og ikkje minst mange av hans kunstverk. Vi trur Nikolai Astrup blir meir og meir kjent rundt om i heile verda i framtida, og ser verkeleg fram til å følgje prosessen med bygging av eit nytt visningssenter 200 meter vest for dagens Astruptun, seier direktøren for Sparebankstiftinga Sogn og Fjordane etter reopninga av Astruptunet og legg til:

-Dette er jo som å vere i eit Astrup-måleri, seier han og ser at Dronning Sonja med reisefølgje set seg inn i ein minibuss og reiser vidare til Sogn.

Det er Sparebankstiftinga Sogn og Fjordane som har kjøpt dei to måleria. Stiftinga er Sparebanken Sogn og Fjordane sin største eigar, og forvaltar overskotet til banken.

 

Tekst og foto: Stig Roger Eide

 

 

 

 

 

 

Kontakt oss

post@sparebankstiftinga.no

Naustdalsvegen 4, 6800 Førde.

Org. 995 883 031

Relevante lenker

Kontakt oss

Logg inn i søknadsportalen

Ofte stilte spørsmål

Personvernerklæring

Følg oss

Facebook-circled Facebook-circled