Skal du søkje om midlar til neste års drift? Då er det viktig å legge ved driftsbudsjett for det året ein søkjer gåve til, og ikkje driftsåret 2015.

Kring årsskiftet får vi normalt inn ein del søknadar om gåver til drift av frivillige lag og organisasjonar. Mange av desse driv om lag på same vis år etter år, og budsjetta for kvart år ser dermed ganske like ut. Då er det fort gjort å leggje ved det budsjettet ein har liggande på PC’en – som gjerne er budsjettet for 2015. Men Sparebankstiftinga si oppgåve er jo å vurdere drifta for det året ein søkjer midlar for, og til dette treng vi budsjettet for 2016. Difor er det særs viktig at det står rett årstal på budsjettet du legg ved søknaden!

Vi er elles kjende med at dei fleste lag ikkje har årsmøte før i februar-april, og at driftsbudsjettet dermed ikkje blir godkjent av årsmøtet før dette. Men vi krevjer heller ikkje at budsjettet skal vere vedtekne av årsmøtet; vi vil berre sjå korleis ein har tenkt å bruke eventuelle gåvemidlar. Så det går altså heilt greitt å legge ved eit budsjett sjølv om det ikkje er vedteke/handsama i laget sine styrande organ.

Har du elles spørsmål om budsjett kan du lese nokre tips her – eventuelt kan du ta kontakt med stiftinga sin administrasjon.

Då er det sendt ut svarmail til dei som søkte om midlar innan søknadsfristen 1. september. Over 5 millionar kroner i gåver vart delt ut i denne runden. Vi legg ut fullstendige lister over alle som fekk gåver i denne runden her på sidene våre i morgon ettermiddag.

 

Sparebankstiftinga Sogn og Fjordane er hovudeigar av Sparebanken Sogn og Fjordane, og deler ut gåver til allmennyttige føremål av utbytet frå bankdrifta. I år deler vi ut 16 millionar kroner i gåver.

Til morgonen i dag gjekk det altså ut svarmail til søkjarane, og det er den som har registrert søknaden som får mailen (hugs å sjekke spamfilteret/”søppelpost”-mappa dersom du ikkje finn svaret i innboksen din).  I tillegg til kring 3,5 mill. kr. i gåver frå årets gåvebudsjett, vart det delt ut 1,5 millionar til nytt bygg- og anleggsstudium i Førde i oppstartsperioden 2016-2019.

Det var om lag 200 søknadar til handsaming i denne runden, og 61 av søknadane fekk ei gåve. Gjennomsnittleg gåvebeløp var på vel 50.000 kroner i denne gåverunden.

Neste søknadsfrist for ordinære søknadar er 1. mars 2016. Dette søknadsskjemaet blir synleg i søknadsportalen frå 1. februar. Men hugs at ein når som helst kan sende “forenkla søknad” for beløp inntil 10.000 kr, og få svar i løpet av 4 veker.

Det blir også kurs i søknadsskriving i Kvammen i Askvoll. Dette kurset blir torsdag 7. mai.

Kurset går altså ut på å gå gjennom korleis ein søknad generelt bør formulerast, uansett kvar ein har tenkt å sende søknad – samt konkret om kva vilkår vi sett til søknadar og tiltak her i Sparebankstiftinga. Kurset kan vere relevant for alle som har planar om å hente inn pengar til verksemda si, men vi har hatt lag og foreningar mest i tankane når kursinnhaldet vart utforma.

Kurset går av stabelen på Allaktivitetshuset (v/Joker-butikken på Høgda i Kvammen) klokka 1800-2100 torsdag 7. mai og er gratis. Påmelding til post[at]sparebankstiftinga.no . Ingen påmeldingsfrist, men vi tek atterhald om ledig plass.

 

Ønskjer du eit søknadskurs der du bur? Kontakt oss – alt du treng er eit lokale med plass til min. 20 menneske, så stiller Sparebankstiftinga med resten. Kurset må òg vere tilgjengeleg for andre (så langt det er plass).

Hjelper søknadskurset? Når vi spurte våre kursdeltakarar om dette, svarte 54% at kurset var «veldig bra», medan 21% gav kurset toppkarakter. 51% svarte dessutan at kurset hadde ført til meir støttemidlar inn til laget/verksemda.

9.-11. mars 2015 skal det avholdast elektronisk val til representantar i stiftinga si generalforsamling. Les meir om generalforsamlinga og kandidatane her.

Sparebankstiftinga er hovudeigar av Sparebanken Sogn og Fjordane og har som sine to hovudoppgaver å forvalte eigarskapen av banken på ein god måte; og dele ut gåvemidlar til allmennyttige tiltak  frå overskotet av bankdrifta.

Stiftinga sitt øvste organ er Generalforsamlinga, og det er kundane i banken som velgjer representantane til generalforsamlinga. Valet vert gjort elektronisk i perioden 9.-11. mars, og alle røysteføre får tilsendt røystesetel på epost.

Generalforsamlinga sine oppgåver kan du lese om i vedtektene våre; dei mest sentrale oppgåvene er å velje stiftinga sitt styre og avgjere kor mykje pengar stiftinga skal dele ut i gåvemidlar kvart år.

 

Valnemnda har i år tilrådd at følgjande kandidatar vert valt inn på fast plass for 4 år i generalforsamlinga:

Jon Gimmestad (Gloppen): f. 1951. Autorisert rekneskapsførar. Driv rekneskapsverksemder både i Nordfjord og Sunnfjord. Har diverse styreverv i privat og offentleg sektor.

Anne Margrethe Ramstad Øvsthus (Førde): f. 1950. Pensjonert sjukepleiar.

Magnar Aasebø (Vågsøy): f. 1956. Direktør i Vest- Norges Fiskesalslag, Måløy. Tidlegare politikar i Vågsøy kommune. Har hatt styreverv i fleire ulike selskap. Utdanning frå Universitetet i Bergen.

I tillegg tilrår valnemnda følgjande kandidatar til varaplass for eitt år:

Dag Rune Mallasvik (Naustdal): f. 1962. Teamleiar i Sunnfjord Energi. Trenar og leiar i Tambaskjelvar  IL. Elektroutdanning.

Jon Rune Heimlid (Stryn): f. 1972. Business Development Manager i OptiPro AS. Tidlegare arbeidd i Vest Buss AS og Vidre AS. Utdanning frå BI.

Linda Hovland (Fjaler): f. 1967. Utanning innan marknadsføring. Dagleg leiar i Fjaler Næringsutvikling.

Laila Johannessen (Hyllestad): f. 1967. Bedriftseigar og dagl.l ved eMal AS frå 2012.Tidlegare m.a. økonomisjef i Gjensidige Bank og seksjonssjef for økonomi- og personal i Hyllestad kommune. Bachelor i økonomi og kurs i styreleiing.

Utanom desse er det forslag om 7 andre kandidatar som ikkje er innstilt av valnemnda:

Steinar Velle (Leikanger): f. 1940. Pensjonist. Tidlegare sorenskrivar.

Åge Avedal (Førde): f. 1979. Faglærar. Dagleg leiar i Sogn og Fjordane 4H.

Per Øyvind Sørbø (Flora): f. 1960. Jobbar som HR-rådgjevar i Sogn og Fjordane Energi. Aktiv innan idrett og bygdeutviklingsarbeid.

Stein Bjørhovde (Eid): f. 1970. Sivilingeniør frå NTH 1993. Medeigar og tilsett i Bas Engineering AS. Diverse styreverv.

Karianne Brøndbo Bergheim (Sogndal): f. 1971. Siviløkonom/statautorisert revisor. Arbeider som økonomidirektør ved Høgskulen i Sogn og Fjordane.

Hilde Karin Refvik (Vågsøy): f. 1966. Bedriftsøkonom. Økonomiansvarleg i Atlantic Seafish AS i Måløy.

Berit Seljeset Osa (Flora): f. 1956. Autorisert Rekneskapsførar. Controller i Flora kommune. Tidlegare dagl.l/fagl.l i rekneskapsbransjen. Har også vore kommunepolitikar i Flora kommune.

Alle kandidatane er valbare jfr. stiftinga sine vedtekter.

 

Generalforsamlinga består elles av følgjande representantar:

Bente Nesse (Høyanger)

Tom Joensen (Bremanger)

Arne Klausen (Askvoll)

Jarl Tyssekvam (Gaular)

Gro Rukan (Florø)

Inger Birgitte Flatjord Kjøsnes (Jølster)

Per Hillern (Sogndal)

Jørill Hovland (Sogndal)

Britt Tjønneland (Førde)

 

Oppdatering: samansettinga av generalforsamlinga etter valet kan du sjå her