Styret i Sparebankstiftinga har vedteke at vi ønskjer å vidareføre satsinga frå Førde, kor klatreparken vi gav gåve til har vore ein kjempesuksess. Vi har allereie løyvd ei gåve til ein tilsvarande klatrepark i Jølster no i haust, og har satt i gong ei kartlegging blant dei andre kommunane i fylket for å få oversikt over kor mange som ønskjer ein klatrepark i sin kommune.

Klatreparken i Førde kom i stand gjennom teiknekonkurransen “Barnegåva” i Firda i fjor haust, kor alle born i Sunnfjord vart inviterte til å teikne forslag til å gjere Førde sentrum betre for dei. Stiftinga, kommunen og Firda ønskte gjennom konkurransen å inkludere dei yngste i tenking kring sentrumsutvikling. Det vart ein kanonsuksess, og Firda fekk inn heile 233 teikningar frå born i alderen 2-12 år. Juryen, med Førde-ordførar Olve Grotle i spissen, fall for to av teikningane: Ulrik Nielsen (8) sitt Klatrefjell og Andreas Skålvik (11) sitt Blyantleikestativ. I tillegg til å vere flotte teikningar, var desse bidraga òg svært typiske: mange av dei innsendte teikningane var kring same tema (klatring og leikestativ).

Etter at vinnarane vart kåra, satte vi i gong med å tolke og konkretisere “bestillinga”, og resultatet vart altså klatreparken med både “blyantar” og det store “klatrefjellet”, og i september kunne ordføraren endeleg offisielt opne klatreparken i Førde. Men allereie under byggeprosessen myldra det av ungar i klatreparken, og sidan då har parken berre fortsett å myldre med entusiastisk aktivitet frå “born i alle aldrar”…

Det gjekk heller ikkje lang tid før spørsmåla byrja å kome frå andre stader i fylket om vi kunne bygge fleire. Og det vil vi gjerne! Vi har difor løyvd pengar til den neste parken allereie; den blir på Skei i Jølster. I tillegg har vi spurt alle dei andre kommunane om dei òg ønskjer ein tilsvarande klatrepark.

Det er fleire grunnar til at vi har retta spørsmålet til kommunane først. Den mest openberre er at tiltaket treng ein utbyggjar som kan ta ansvar for vedlikehald i mange år framover, og som har ei tomt på ein offentleg og sentral plass i kommunen som ein kan nytte til føremålet. Kommunane kan òg søkje om spelemidlar, dersom tiltaket er inkludert i kommunedelplanar for fysisk aktivitet. Men om kommunane evt. ønskjer å gjennomføre tiltaket via eller saman med lokale partnarar, er vi opne for å diskutere dette med kvar einskild kommune.

Men spørsmålet alle lurer på no, er sjølvsagt “NÅR kjem det klatrepark der EG bur?” Og då må vi ærleg svare at det veit vi ikkje enda. Men stiftinga har byrja med kartlegginga av kor mange kommunar som ønskjer klatrepark; og så må både vi og kommunane få litt tid på å ordne med formalitetar og praktisk tilrettelegging. Men Sparebankstiftinga ønskjer i alle fall å følgje opp med gåver til dei neste klatreparkane allereie til våren. Så håper vi nokre av kommunane er klare til å setje spaden i jorda så snart snøen smeltar…

Styret i stiftinga vedtok på styremøte denne veka å dele ut 57 gåver på til saman 4 millionar  kroner til allmennyttige føremål i fylket vårt.

Styret i Sparebankstiftinga slutthandsama denne veka alle søknadane som var komne inn til søknadsfristen 1. september, og beslutta å dele ut heile 4.007.000 kroner. I dag byrjar den glade jobben med å sende ut tildelingsbrev!

Stiftinga har så langt i år motteke over 660 søknadar om til saman over 71 millionar kroner, så sjølv om stiftinga har auka rammene for gåver frå 9 millionar i 2012 til 12,5 millionar kroner i år, har vi diverre ikkje rom for å imøtekome alle søknadane. Men det blir i alle fall fleire og/eller større gåver enn i fjor!

Alle tildelte gåver vert publiserte på sida Tildelte Gåver fortløpande. Men vi gjer merksam på at vi ikkje rekk å sende ut svar til alle i dag – på grunn av mange søkjarar kan det hende de ikkje får svar på søknaden før på måndag 4. november. Vi ber om forståing for dette.

Sparebankstiftinga, NRK og Sparebanken Sogn og Fjordane kårer Årets Gründer, med 100.000 kroner i premie!

Vi vidarefører fjorårets samarbeid med Sparebanken og NRK Sogn og Fjordane, kor vi saman kårar den beste gründer-idéen i fylket.

Vi inviterer alle gründerbedrifter til å søkje; vilkåra er at

1) Verksemda må vere skipa i Sogn og Fjordane, eventuelt at skiparen er frå fylket

2) Verksemda må vere komen så langt at ho kan vise til noko inntekter

Vi har elles ikkje satt noko absolutt grense for kor gamal idéen kan vere, av di det er svært varierande kor lang tid verksemder treng på realisering. Men juryen ser etter dei verksemdene som er i ei satsingsfase – og som vil ha stor nytte av merksemda, anerkjenninga og sjølvsagt pengane til vidare satsing.

Konkurransen går ut på at ein jury først vil plukke ut fem finalistar som blir fyldig presentert på NRK Sogn og Fjordane sine sendingar og websider. Deretter vil publikum bli invitert til å stemme på sin favoritt blant finalistane – avstemminga vil gå føre seg på NRK Sogn og Fjordane si nettside. På bakgrunn av stemmeresultat vil juryen presentere ein vinnar på Temposeminaret i Florø 1. november. Kåringa vil òg bli overført “live” på NRK Sogn og Fjordane si radiosending.

Konkurransen var svært populær i fjor, og mønstra over 40 søkjarar; noko som syner at det verkeleg er eit godt gründermiljø i fylket. Vinnaren i fjor vart Highsoft Solutions i Vik. Dei leverer avanserte web-presentasjonar og grafikk, og har m.a. over halvparten av verdas 100 største verksemder på kundelista.

Søknadsfristen er 1. oktober, og ein sender inn ei presentasjon av si verksemd og forretningsidé til grunder@nrk.no. 

Det frivillige lags- og organisasjonslivet i fylket har tydelegvis tent på alle pluggane for OPPTUR 2013: Allereie eit døgn etter at vi la ut invitasjonen passerer vi 100 påmeldte!

OPPTUR er Sparebankstiftinga si gåve til alle som er engasjert i frivillig arbeid i fylket, som blir invitert til ein kveld med god mat, ny kunnskap og inspirasjon til å løfte laget sitt vidare den 3. oktober; les meir om programmet her.

Arrangementet har dei siste fire åra vore på Skei (då med namnet “Eldsjelsamlinga”), og har samla kring 200 deltakarar. Så når vi flytta arrangementet til Førde og la det i forkant av musikkmiljøet sitt arrangement BLEST, tinga vi like godt den største salen på Rica Sunnfjord hotell, slik at vi kunne få plass til 250 gjester.

Dette har tydelegvis fenga målgruppa: Aldri før har vi sett slik trøkk kring påmeldinga, og med ein slik første dag er vi så sikre på at det vert fullt i god tid før påmeldingsfristen 20. september at vi måtte “åtvare” dykk om å vere langt raskare på labben enn tidlegare… Men det tyder òg at alt ligg til rette for at dette blir eit flott arrangement og ein fantastisk arena for oss i Sparebankstiftinga å kome i nærare dialog med dykk som vi prøver å hjelpe med utbytet vårt frå Sparebanken Sogn og Fjordane. Så no gler vi oss berre enda meir til torsdag 3. oktober!

PS hugs å skrive namnet på kva lag du er frivillig i når du sender inn påmeldinga! Då vil laget ditt nemleg bli med i ei avstemming om ei gåve på 20.000 kroner (avstemminga vert sett i gong etter påmeldingsfristen). Gåva vert overrekt på arrangementet – viss vinnaren av avstemminga er til stades…

Stiftinga førebur haustens store gåveslepp!

Det ser ut som at Sparebankstiftinga sine søknadsfristar 1. mars og 1. september byrjar å feste seg blant organisasjonslivet i fylket, og det er jo flott. Men ei påminning om å hugse å “kvesse søknadsblyanten” innan månadsskiftet kan likevel vere på sin plass.

Eit par viktige ting å hugse på:

– Ein MÅ sende inn søknad via søknadsportalen her på nettsida vår; vi har diverre ikkje høve til å ta imot søknad pr epost, brev, fax eller personleg oppmøte. Dette er for at vi skal bruke minst mogleg ressursar på administrasjon, slik at meir pengar kan gå til gåver – så vi voner at alle ønskjer å hjelpe oss med dette..!

– Søknadsskjemaet for “Fullstendig søknad” (altså der ein kan søkje om over 10.000 kroner) er opent TIL OG MED 1. september (skjemaet vert fjerna ved midnatt natt til 2. september).

– Budsjett er eit ABSOLUTT krav! Så legg du ikkje ved budsjett over tiltaket du søkjer pengar til – treng du eigentleg ikkje sende søknaden…

– Hugs på føremålet vårt når du skriv søknaden, og få fram DEN ALLMENNYTTIGE VERDIEN ved tiltaket du søkjer om gåve til!

For seint ute? Hugs at du kan sende inn “Forenkla søknad” (om gåvebeløp under 10.000 kroner) når som helst, heile året – og få svar i løpet av fire veker. Svar på “Fullstendig søknad” får du forresten etter ca 8 veker, til epostadressene du nytta når du registrerte søknaden.

Elles må du ha TVI TVI med tiltaket ditt – og hugs at det berre er å ta kontakt dersom du har spørsmål om søknaden!