Det frivillige lags- og organisasjonslivet i fylket har tydelegvis tent på alle pluggane for OPPTUR 2013: Allereie eit døgn etter at vi la ut invitasjonen passerer vi 100 påmeldte!

OPPTUR er Sparebankstiftinga si gåve til alle som er engasjert i frivillig arbeid i fylket, som blir invitert til ein kveld med god mat, ny kunnskap og inspirasjon til å løfte laget sitt vidare den 3. oktober; les meir om programmet her.

Arrangementet har dei siste fire åra vore på Skei (då med namnet “Eldsjelsamlinga”), og har samla kring 200 deltakarar. Så når vi flytta arrangementet til Førde og la det i forkant av musikkmiljøet sitt arrangement BLEST, tinga vi like godt den største salen på Rica Sunnfjord hotell, slik at vi kunne få plass til 250 gjester.

Dette har tydelegvis fenga målgruppa: Aldri før har vi sett slik trøkk kring påmeldinga, og med ein slik første dag er vi så sikre på at det vert fullt i god tid før påmeldingsfristen 20. september at vi måtte “åtvare” dykk om å vere langt raskare på labben enn tidlegare… Men det tyder òg at alt ligg til rette for at dette blir eit flott arrangement og ein fantastisk arena for oss i Sparebankstiftinga å kome i nærare dialog med dykk som vi prøver å hjelpe med utbytet vårt frå Sparebanken Sogn og Fjordane. Så no gler vi oss berre enda meir til torsdag 3. oktober!

PS hugs å skrive namnet på kva lag du er frivillig i når du sender inn påmeldinga! Då vil laget ditt nemleg bli med i ei avstemming om ei gåve på 20.000 kroner (avstemminga vert sett i gong etter påmeldingsfristen). Gåva vert overrekt på arrangementet – viss vinnaren av avstemminga er til stades…

Stiftinga førebur haustens store gåveslepp!

Det ser ut som at Sparebankstiftinga sine søknadsfristar 1. mars og 1. september byrjar å feste seg blant organisasjonslivet i fylket, og det er jo flott. Men ei påminning om å hugse å “kvesse søknadsblyanten” innan månadsskiftet kan likevel vere på sin plass.

Eit par viktige ting å hugse på:

– Ein MÅ sende inn søknad via søknadsportalen her på nettsida vår; vi har diverre ikkje høve til å ta imot søknad pr epost, brev, fax eller personleg oppmøte. Dette er for at vi skal bruke minst mogleg ressursar på administrasjon, slik at meir pengar kan gå til gåver – så vi voner at alle ønskjer å hjelpe oss med dette..!

– Søknadsskjemaet for “Fullstendig søknad” (altså der ein kan søkje om over 10.000 kroner) er opent TIL OG MED 1. september (skjemaet vert fjerna ved midnatt natt til 2. september).

– Budsjett er eit ABSOLUTT krav! Så legg du ikkje ved budsjett over tiltaket du søkjer pengar til – treng du eigentleg ikkje sende søknaden…

– Hugs på føremålet vårt når du skriv søknaden, og få fram DEN ALLMENNYTTIGE VERDIEN ved tiltaket du søkjer om gåve til!

For seint ute? Hugs at du kan sende inn “Forenkla søknad” (om gåvebeløp under 10.000 kroner) når som helst, heile året – og få svar i løpet av fire veker. Svar på “Fullstendig søknad” får du forresten etter ca 8 veker, til epostadressene du nytta når du registrerte søknaden.

Elles må du ha TVI TVI med tiltaket ditt – og hugs at det berre er å ta kontakt dersom du har spørsmål om søknaden!

Fortvilande mange søkjarar trur “forenkla søknad” tyder at ein ikkje treng vedlegg, så vi understrekar at ALLE søknadar må legge ved budsjett!

Søknadskategorien “Forenkla søknad” har blitt så populær at vi har nesten dobla potten som er sett av til dette – igjen! Faktisk er over halvparten av søknadane vi får inn i kategori “forenkla søknad”, og det tar vi sjølvsagt som eit teikn på at vi tenkte rett når vi opna for ei ordning med løpande søknadsfrist med kortare handsamingstid for søknadar om beløp under 10.000 kroner.

Men det kan hende at namnet “forenkla søknad” er litt villedande: Fortvilande mange søkjarar droppar nemleg å legge ved budsjett. Og då går søknaden rett til avslag, sjølv om det elles kan vere gode allmennyttige tiltak ein søkjer om gåve til! Kravet om budsjett er nemleg absolutt. Heldigvis er det jo mogleg å søkje om att i same sekund ein evt. får avslag, men det er sjølvsagt betre å få det rett første gongen..!

Ein sjeldan gong får vi elles budsjett på EI linje; der det omsøkte tiltaket er einaste “post” på budsjettet. Vi er ikkje veldig formelle, men vi forventar at eit budsjett består av minimum tre deler: Ein utgiftspost, ein inntektspost og ei sum-kolonne. Er du usikker på korleis eit budsjett ser ut, kan du lese meir på søknadstips-sida vår, og dessutan kan du laste ned eit døme på eit enkelt budsjett her.

Eventuelt kan du ta kontakt med administrasjonen, så får du hjelp til å sette opp søknaden.

Stiftinga sitt høgste organ Generalforsamlinga vedtok 18.04.13 m.a. å auke gåvebeløpet frå 9 millionar kroner til 12,5 millionar kroner. Les meir om vedtaka her.

Stiftinga heldt si ordinære Generalforsamling torsdag 18. april, og i tillegg til vedtaket om å auke det årlege gåvebeløpet med 28%, vart det m.a. gjort vedtak om:

Val av styre; samt reduksjon av styret frå sju til fem medlemer

Styreleiar Trude Brosvik (Gulen) og styremedlem Kåre Furnes (Måløy) var ferdige med sine periodar, og desse vart ikkje erstatta. I staden vart styret redusert frå sju til fem medlemer. Tidlegare nestleiar i styret Kjartan Strand (Florø) vart vald til ny styreleiar, og styremedlem Aslaug Nesje Bjørlo (Sandane) blei ny nestleiar. I tillegg vart Lise Mari Haugen (Askvoll) gjenvald som styremedlem. (styremedlemer Tore Jakob Madsen og Bjørn Vollstad har elles eitt år igjen av sine styreverv.)

Halvering i godtgjersle for styremedlemer, nestleiar og leiar av valnemnd

Sparebankstiftinga tilstreber ei kostnadseffektiv drift for at mest mogleg av pengane skal gå til gåver, og minst mogleg til administrasjon og drift. Generalforsamlinga syns difor det var eit viktig signal at ein nyttar sparekniven også på eigne godtgjersler til styre og valnemnd. Dette var òg ei grunngjeving for å redusere talet på styremedlemer. Dermed vart godtgjersla til styremedlemene og nestleiar halverte, medan godtgjersla til leiaren av valnemnda vart stroke heilt. (Styreleiar si godtgjersle vart elles halde på same nivå, av di ein ventar ei stor auke i styreleiar si arbeidsmengd i tida frametter.)

Årsmelding

Generalforsamlinga godkjente òg styret si årsmelding for 2012, som du kan laste ned her.

(mindre) endring av føremålsparagrafen i stiftinga

Det vart gjort nokre mindre endringar i stiftinga sin føremålsparagraf, slik at ordlyden blir lik dei fleste andre sparebankstiftingane. Du kan lese den nye formuleringa i møteprotokollen, som du kan laste ned her. (Alle endringar i vedtektene skal godkjennast av Finanstilsynet, og vert difor ikkje gjort gjeldande før slik godkjenning ligg føre.)

Det er dessutan halde innskytarval i forkant av Generalforsamlinga: 11.-13. mars vart følgjande innskytarar vald inn i Sparebankstiftinga si Generalforsamling:

Medlemer: Gro Rukan, Tom Joensen og Inger Birgitte Flatjord Kjøsnes (valde for 4 år).

Varamedlemer: Britt Tjønneland, Viggo Leikanger, Dag Rune Mallasvik og Jon Rune Heimlid (valde for 1 år).

Det vart elles avlagt 8884 stemmar ved valet, noko som er rekord med solid margin.