Bli med i konkurransen om 100.000 kroner!

Fjorårets vinnar, Utkantfestivalen

Sparebankstiftinga og NRK Sogn og Fjordane inviterer i år som i fjor kulturlivet i fylket til å konkurrere om den gjeve tittelen “Årets Kultur-idé”. Vi inviterer difor alle kultur-entreprenørar til å melde inn sitt prosjekt – anten det berre er ein tanke eller eit eksisterande kulturtilbod. Ikkje berre vil vinnaren få 100.000 kroner til å gjennomføre idéen, men ca 10 finalistar vil bli presentert i full breidde på NRK Sogn og Fjordane sine radiosendingar og nettsidene deira.

Som tittelen antydar, er det dei kreative konsepta vi ser etter; og sjølv om det var Utkantfestivalen som vann i fjor er det ikkje storleik eller røynsle som er avgjerande i denne konkurransen. Ein stiller like sterkt med ein ny og uprøvd idé som eit innarbeidd konsept.

Søknadsfristen for å vere med på konkurransen er i år sett til 15. april. Straks etter dette vil ein jury plukke ut finalistane, og så vil publikum bli invitert til å stemme fram sin favoritt. Publikum og juryen si meining vil bli vekta likt i den endelege kåringa av vinnar-idéen. I fjor vart vi dessutan så imponert at også to andre kandidatar fekk ei pengegåve frå Sparebankstiftinga Sogn og Fjordane…

Sparebankstiftinga vil med denne konkurransen gi auka merksemd til den fantastiske breidda av arrangørar og kultur-entreprenørar som vi har i fylket vårt; og kanskje òg inspirere nokon til å setje i gong fleire nye og kreative konsept.

Meld deg på konkurransen ved å sende ein mail til kulturide@nrk.no med ein kort presentasjon av idéen din. Hugs å skrive «Årets kulturidé 2013» i emnefeltet.

Sparebankstiftinga Sogn og Fjordane byrja i fjor vår å halde innføringskurs i korleis skrive gode prosjektsøknadar, noko som har vore ein kjempesuksess. Til no har over 500 eldsjeler i fylket fått tips til kva både vi og andre stønadsforvaltarar synst er gode søknadar, og deltakarane har gitt svært gode tilbakemeldingar på kurset.

Difor arrangerer vi no oppfølgingskurs for deg som vil følgje dette emnet litt lenger. Også dette kurset er gratis; men vi føreset at du har delteke på innføringskurset. Dette kurset vil spesielt ha fokus på korleis du bør presentere eit prosjekt, så det er mest relevant for deg som har eit konkret prosjekt du held på med  å finne finansiering til (evt. står foran ein slik prosess).

Kurset blir arrangert på Studentkroa Akutten i Førde måndag 25. februar 2013 klokka 1800-2100.

Påmelding til [email href=”post@sparebankstiftinga.no”]post[at]sparebankstiftinga.no[/email]  Ver ven å skrive fullt namn, mobilnr og kva organisasjon du kjem frå i påmeldinga (NB på alle, viss du melder på fleire). Ingen påmeldingsfrist, men vi tek atterhald om ledig plass (max 20 personar!)

Det blir enkel servering på kurset. Kurshaldar er kultursjef Pål Fidjestøl, og lokal kursvert er Studentsamfunnet i Førde.

Har du ikkje fått med deg innføringskurset i søknadsskriving? Det blir nok ikkje så lenge til neste kurs – følg med på sidene våre om du er interessert i dette.

Sparebankstiftinga sine populære gratiskurs i søknadsskriving fortset sjølvsagt til neste år. Først ut er Stryn 14. januar.

Sparebankstiftinga Sogn og Fjordane byrja i vår med kurs i korleis skrive gode prosjektsøknadar, noko som har vore ein kjempesuksess. Til no har kring 500 eldsjeler i fylket fått tips til kva både vi og andre stønadsforvaltarar synst er gode søknadar, og deltakarane har gitt svært gode tilbakemeldingar på kurset.

Desse søknadskursa fortset vi sjølvsagt med, og første kurs i 2013 blir på kulturhuset i Stryn måndag 14. januar klokka 1800-2100. Lokal kursvert er Stryn kommune. (Påmelding: sjå nedst på sida.)

Vi har òg erfart at mange av kursdeltakarane får “blod på tann” av søknadskurset, og ønskjer å setje seg meir inn i korleis ein kan hente finansiering sjølv til ganske ambisiøse prosjekt: Korleis argumenterer ein best for prosjektet? Og når ein er avhengig av fleire støttespelarar, i kva rekkefølgje søkjer ein desse? Difor set vi no i gong ein runde med oppfølgingskurs for deg som vil følgje dette emnet litt lenger. Også dette kurset er gratis; men vi føreset at du har delteke på innføringskurset omtalt ovanfor. Oppfølgingskurset er mest relevant for deg som har eit konkret prosjekt du held på med  å finne finansiering til (evt. står foran ein slik prosess).

Det blir halde eitt kurs for Nordfjord, eitt for Sunnfjord og eitt for Sogn på desse dagane/stadene:

Sogn: Studenthuset Meieriet tysdag 15. januar klokka 1800-2100

Nordfjord: Gloppen hotell onsdag 16. januar klokka 1800-2100.

Kurset i Sunnfjord vert annonsert på nyåret.

Påmelding (alle kursa) til post[at]sparebankstiftinga.no. Ingen påmeldingsfrist (men vi tek atterhald om ledig plass).

Sidan Eldsjelsamlinga på Skei 28. september har vi vore rundt og overraska talentfulle ungdomar med sjekkar på 25.000 og 50.000 kroner. Gjett om det var moro!

Cedrik Fonn Skåre og Aud Julie Befring var dei første som fekk Furorestipend 2012.

Furorestipendet vert som kjent delt ut til ungdom (15-30 år) med framifrå talent innan sitt felt – anten det er idrett, kultur eller “open klasse”. I år hadde juryen så mykje gode kandidatar å velgje mellom, og difor store problem med å knipe ned talet på stipend – så dei delte like godt ut heile ni stipend denne gongen. Her er for første gong den fullstendige oversikta over vinnarane (alder, aktivitetsområde og heimekommune i parentes bak namnet):

Cedrik Fonn Skåre (16 år; gocart/motorsport; Førde)
Line Dybedal (24; musikk (vokal); Selje)
Fredrik Høstaker (22; song/dans/drama; Førde)
Jantsen Øverås (17; vektløfting; Fjaler)
Kari Bergheim Hole (21; alpint; Førde)
Cecilie Aalberg (20; musikk (trompet); Eid)
Gjøran Tefre (18; langrenn; Førde)
Aud Julie Befring (26; design; Jølster)
Øyvind Strømmen Kjerpeset (21; friidrett; Flora)

Stipenda vart altså ikkje delt ut samla i år; i staden overrumpla vi dei inkje-anande vinnarane på ulike arrangement og arenaer ut over hausten. På denne måten fekk både vi og publikum ta del i gleda deira, noko som har vore heilt fantastisk for alle oss som har fått vere med. Takk til alle stipendvinnarane – og tvi tvi med vidare utvikling innanfor feltet dykkar – vi kjem til å følgje nøye med dykk vidare!

Juryen for Furorestipendet har i år som i fjor bestått av Terje Lyngstad (SoFT), Jo Inge Gåsvær (Førde Fotball), Torill G. Faleide (Førdefestivalen), Reiel Haugland (Sparebanken Sogn og Fjordane) og Pål Fidjestøl (Sparebankstiftinga).

Søknadsfrist for neste års Furorestipend er 15. Juni 2013.

Her er dei som har fått gåver frå Sparebankstiftinga Sogn og Fjordane i årets siste ordinære gåverunde: Les meir